Խոսենք այն սկզբնախաղերի մասին, որոնց երբեք նախկինում չեք բախվել:
Շախմատիստները սովորաբար իրենց մտքում ունեն սկզբնախաղերի «քարտեզ», գիտեն զարգացման հիմնական գաղափարը, ինչպես դասավորել խաղաքարերը, որ խաղաքարերը պահել, որոնք փոխանակել, որ խաղաքարի վրա հարձակվել և այլն: Նրանք գիտեն նաև այն սովորական սխալները, որ սովորաբար թույլ են տալիս այս սկզբնախաղերի ժամանակ և ինչպես օգուտ քաղել դրանցից:
Եթե ձեր մտքում չունեք այդ քարտեզը, այս ուղեցույցը կօգնի ձեզ գլուխ հանել այդ սկզբնախաղից և կծանոթացնի մի քանի միջոցներին, որոնք կօգնեն դուրս գալ սկզբնախաղից:
Եթե հաճախ եք շախմատ խաղում, ապա համոզված կարելի է ասել, որ երբեմն բախվում եք այնպիսի սկզբնախաղերի, որոնք նախկինում երբեք չեք խաղացել, կամ չեք տեսել: Եթե սկսնակ շախմատիստ եք, ապա առավել հաճախ կարող եք հանդիպել նման անհայտ սկզբնախաղերի: Հետևաբար, եթե դուք սկսնակ եք, այսօրվա տեղեկատվությունը կարող է շատ օգտակար լինել ձեզ համար: Սակայն, նույնիսկ, եթե դուք երկար ժամանակ է, ինչ շախմատ եք խաղում, բայց չունեք սկզբնախաղերի պաշար, ապա նույնպես կհայտնվեք նման իրավիճակում, երբ հակառակորդը անակնկալի կբերի ձեզ սկզբնախաղի նոր տարբերակով:
Եկե՛ք պատկերացնենք, որ դուք խաղում եք մի սկզբնախաղ, բայց ձեր հակառակորդը չի խաղում այն տարբերակը, որ դուք ակնկալում էիք: Այլ կերպ ասած, ի հայտ եկած դիրքը նախկինում երբեք չեք տեսել և չգիտեք, թե ինչպես կարելի է առաջ գնալ:
Սխալ#1
Հայտնվելով անծանոթ սկզբնախաղային դիրքում` շախմատիստները սկսում են արագ քայլեր անել, կարծես թե նախկինում բազմիցս խաղացել են այդ դիրքում: Անհրաժեշտ է հասկանալ, որ նման դեպքերում խորը վերլուծությունը ավելի քան անհրաժեշտ է: Իհարկե, Դուք չեք ցանկանա ցույց տալ հակառակորդին, որ պատկերացում անգամ չունեք, թե ինչպես է պետք խաղալ արդեն իսկ 2-րդ քայլից հետո, սակայն վատ քայլեր անելն ավելի վատ է: Արդյունքում, սխալներ թույլ կտաք և նյութական կորուստ կունենաք:
Լուծում․ երբ հայտնվում եք անծանոթ դիրքում, մի՛ շտապեք: Շտապելով և սխալ քայլեր անելով` դուք ավելի կբարդացնեք ձեր վիճակը: Փոխարենը վերլուծե՛ք դիրքը և հետագա ձեր քայլերի պլան մշակեք:
Սխալ #2
Եթե սկզբնախաղի ընթացքում սխալ եք թույլ տալիս, կամ զգում եք, թե ձեր դիրքը վատն է, պետք է կարողանաք հանգստացնել ինքներդ ձեզ: Ինչքան շուտ գիտակցեք, որ պարտվում եք, այնքան ավելի շատ ժամանակ կունենաք խաղը փրկելու համար: Հետևաբար, դուք պետք է կամ պաշտպանվեք և փորձեք պահել ձեր խաղաքարերը, կամ որոշ խաղաքարեր զոհաբերեք` մտնելով խաղի մեջ:
Սխալ#3
Երբ շախմատիստները բախվում են անծանոթ սկզբնախաղերի, նրանք դիմում են երկու տարբեր ծայրահեղ քայլերի: Նրանցից շատերի մոտ վախ է առաջանում անծանոթ իրավիճակից և սկսում են պասիվ խաղ ցույց տալ: Այդ դեպքում հակառակորդը կարողանում է ձեռք բերել գերիշխող դիրք, լավ վերահսկողություն և հաղթում է խաղը: Մյուսներն էլ շատ ագրեսիվ խաղ են սկսում` չնայած, որ այնքան էլ չեն տիրապետում տարածքին: Նրանք հաճախ ընդունում են զոհաբերված խաղաքարը և արդյունքում հայտնվում ջախջախիչ, ավերիչ հարձակման կիզակետում:
Լուծում․ լավագույն տարբերակը ոսկե միջինն է: Ցանկացած սկզբնախաղում, հատկապես անծանոթ, դուք պետք է զարգացնեք խաղաքարերը և արքային անվտանգ դիրք տաք` նախքան հակառակորդի դեմ ինչ-որ գործողություն սկսելը: Պետք է պահեք սկզբնախաղային կանոնները։ Անծանոթ սկզբնախաղում զոհաբերված խաղաքար ընդունելու փոխարեն կարելի է ձեր սեփական խաղաքարերը զարգացնել: Մյուս տարբերակը շատ վտանգավոր է, և վաղ թե ուշ վատ դիրքում կհայտնվեք. երկու զինվոր շահելու փոխարեն լավ կլինի պաշտպանել արքային` մատային դիրքից խուսափելու համար:
Ամփոփում`
- Երբ անհայտ սկզբնախաղ եք խաղում, ավելի շա՛տ ժամանակ հատկացրեք դիրքի վերլուծության վրա, պլա՛ն մշակեք և խուսափե՛ք սխալներից:
- Գիտակցե՛ք, որ խնդիրներ ունեք, և մի՛ հանգստացրեք ինքներդ ձեզ` մտածելով, որ ամեն ինչ հիանալի է: Ինչքան շուտ տեսնեք խնդիրը, այնքան շատ ժամանակ կունենաք խաղը փրկելու համար:
- Ագրեսիվ մի՛ խաղացեք` զոհաբերված խաղաքար ընդունելով կամ չնախապատրաստված հարձակում գործելով:
- Պասիվ խաղ մի՛ ցուցաբերեք` խաղաքարերը խաղատախտակին գամված պահելով և չշտկելով դրանց սխալ դասավորությունը:
