Հովհաննես Գաբուզյանը ծնվել է 1995 թվականի մայիսի 19-ին։
Հայաստանը բազմիցս ներկայացրել է տարբեր տարիքային խմբերի աշխարհի ու Եվրոպայի առաջնություններում՝ շահելով չորս արծաթե մեդալ։
Երկու անգամ Հայաստանի հավաքականի կազմում մասնակցել է մինչև 16 տարեկանների համաշխարհային օլիմպիադաներին՝ նույնպես շահելով չորս մեդալ.
Գաբուզյանը բազմիցս մրցանակիր է դարձել նաև Հայաստանի պատանեկան առաջնություններում, այդ թվում՝ երեք անգամ նվաճելով ոսկե մեդալներ։
Գրոսմայստեր դառնալու համար անհրաժեշտ նորմերը լրացրել է 2012 թվականին Պլովդիվում կայացած Եվրոպայի առաջնությունում և Ալբենայում։
2014 թվականին հաղթել է Վառնայում կայացած բաց մրցաշարում։
Նույն թվականին դարձել է Հայաստանի արագ շախմատի չեմպիոն։
Անհատական վարկանիշի առավելագույն ցուցանիշին հասել է 2019 թվականի հուլիսին (2622):
2016 թվականին Հովհաննես Գաբուզյանը դարձավ Աբու Դաբիում կայացած Համաշխարհային համալսարանական 14-րդ խաղերի չեմպիոն (9 հնարավորից 8 միավոր)։
2017 թվականի հունվարին Հովհաննեսը` 9 հնարավորից վաստակելով 5½ միավոր, դարձավ դասական շախմատի Հայաստանի չեմպիոն և համալրեց Հայաստանի հավաքականի կազմը։
2021 թվականին կրկնեց հաջողությունը՝ 11 հնարավորից վաստակելով 8,5 միավոր և կրկին դառնալով Հայաստանի չեմպիոն։